DOCUMENTO anno 1295

Una “questione” tra il Precettore della S. Casa della SS. Trinità (la Magione) ed il priore del convento di S. Agostino di Palermo risolta amichevolmente nel 1295.

De protestacione frumenti salmarum septem facta contra fratres sancti Augustini pro quibusdam terris sitis prope Rasalayn. In nomine Domini amen. Anno a nativitate eiusdem millesimo ducentesimo nonagesimo quinto mense Iulii vigesimo nono eiusdem octave inditionis. Regnante serenissimo domino nostro domino rege Iacobo gloriosissimo aragonum Sicilie maioricarum et valencie rege ac comite Barchalonis regnorum eius aragonum maioricarum valencie et comitatus Barchalonis anno quinto Sicilie vero anno decimo feliciter amen. Nos Iohannes de Campo Iudex civitatis Panormi Franciscus de notario Robberto regius publicus eiusdem civitatis notarius et testes subscripti ad hoc vocati specialiter et rogati, presenti scripto publico notum facimus et testamur quod frater Lyboctus preceptor Sacre Domus Sancte Trinitatis de panormo ad nostram accedens presenciam nostrum qui supra judicis et notarii officium imploravit ut una secum deberemus presencialiter nos conferre ad ecclesiam sancti Augustini de panormo audituri qualiter predictus preceptor intendit dare tradere et assignare priori et conventui sancti augustini de panormo salmas frumenti septem quas eidem priori et conventui dare non tenetur pro eo quod dictus prior et conventus commentatori predicte ecclesie Sancte Trinitatis vendiderunt omne jus, quod habebant in predictis salmis frumenti septem quas debebant habere de quodam tenimento terrarum sito iuxta casale rasalayni pro unciis auri novem ponderis generalis et ob hoc dictus preceptor solvere intendit predictas (salmas) frumenti sub ista protestacione quod ipsas vult solvere si solvere tenetur alioquin quod possit indebitum tamquam repetere et habere predictas salmas frumenti septem a predictis Priori et conventu cuius peticionibus justis utpote annuentibus ad predictam ecclesiam nos contulimus presenciales et nobis ibidem presentibus dictus preceptor predicte ecclesie Sancte Trinitatis in nostri presencia sub protestacione infrascripta assignavit predicto priori et conventui predicte ecclesie salmas frumenti septem videlicet quod ipsas frumenti obtulit recipiendas per predictos priorem et conventum si eis tenetur et debet alioquin possit tamquam indebitum conducere et habere raccione predicta qui prior et conventus facta oblacione predicta responderunt non teneri recipere predictas salmas frumenti pro eo quod jus quod habebant in predictis permutaverunt cum dicto domino philippo de trayna et propterea predictas salmas frumenti si voluerit offerre offerat predicto domino philippo de Trayna quibus sic gestis coram nobis predictus preceptor nostrum officium imploravit ut ad cautelam predicte ecclesie scriptum publicum facere deberemus cuius precibus justis et juris consonis annuentes predictam protestacionem nostri qui supra judicis judiciaria auctoritate interposita ipsam in forma publica redigi fecimus et transcribi. Unde ad huius rei memoriam et predicti preceptoris certitudinem et cautelam presens publicum instrumentum de predicta assignacione factum est per manus mei predicti notarii meo signo mei qui supra judicis et subscriptorum testium subscripcionibus et testimonio roboratum. Actum panormi anno mense die et inditione premissis.

Ego Iohannes de Campo qui supra judex me subscripsi.

Ego paganus de macarone testis sum

Ego simon barata testis sum

Ego Bartholomeus de adam testis sum *

E go Iacobus catteranus testis sum *

Ego Iohannes de monte testis sum *

Ego vinchius de calatabuturo testis sum *

qui nescientes scribere nos per manus predicti notarii scribi fecimus et testamur.

Ego Franciscus de notario roberto regius publicus notarius rogatus predictis interfui scripsi predicta et meo sigillo signavi. Testes paganus de maccarono symon baracta bartholomeus de adam jacobus catteranus johannes de monte vinchius de calatabuturo paganus de alfano.

(Archivio di Stato di Palermo. Monumenta Historica Sacrae Domus Mansionis, n. 277 (270). anno 1295: “de Rasalayna panormi utilitate. Panormi 1295”.

A. Mongitore, Monumenta Historica S. Domus Mansionis. Panormi 1719, pp. 61 s.)